المساعد الشخصي الرقمي

مشاهدة النسخة كاملة : ماهذا يا تلفزيون قطـــر ؟!


الاستعـ180ـلامات
10-06-2004, 12:30 PM
بسم الله الرحمن الرحيم ..

منذ قديم الزمان (( قبل سنتين :24: )) كان تلفزيون قطر من أفضل محطات الخليج ، اذا ما قلنا افضلهم .. كان تلفزيون قطر رائع بمعنى الكلمة .. من برامج ومسلسلات وحتى رسوم متحركة ..

الآن !! ماهو تلفزيون قطر ؟؟

تلفزيون قطر الآن صار يهبط تدريجياً ، الصراحة مأساة نشهدها يوميا في شاشتنا الحبيبة ..
* برنامج الرياضة .. صراحة لا أعرف اسمه بس فيه واحد من جنسية لبنانيه على ما اعتقد ومعاه بنتين ويعلمهم يسوون رياضة !! والمشكلة الأعظم انه من انتاج تلفزيون قطر ؟ الصراحة البرنامج يجيب الوجعه ونشوف حركات صج صج مانحب نشوفها حتى في شاشات خارجية .. ليش ما يكونون شباب اللي يتدربون معاه يعني ؟ والا اذا كانوا شباب محد بيشوف البرنامج ؟!

* نشرات الأخبار صراحة كئيبة والديكور جدا كئيب .. المفروض خلفية الأخبار تكون احلى من جذي .. وبعدين مادري يعني اذا عندهم نقص في المذيعين ؟؟ المذيعين اللي حاطينهم كلش ما ينفعون صراحة .. وكلهم في صوب ومالت النشرة الجوية في صوب .. مادري ليش ما يحطون ترجمه في نشرتها .. يا جماعة كله حرقات!!

* اسماء بعض البرامج مثل Sports Art .. مادري شعاجبهم في الاسامي الانجليزية .. مع ان هالشئ سخيف ، ليش ما يكون اسم البرنامج الرياضة العالمية مثلا .. أو " فنون الرياضات " وهي ترجمة الاسم الانجليزي ..

* الفقرات الاعلانيه .. مأساة في الفقرات الإعلانية وخصوصا اذا ظهر لنا شعار تلفزيون قطر .. الفقرة تعور الراس يا شباب .. الله يرحم ايام المصمم الرائع " نواف النصف " (( مصمم مقدمة حكم البشر وعيال الذيب و يوم آخر ")) كانت تصاميمه عجيبة في الفقرات الاعلانية وكان شعار التلفزيون جميل جدا بتصاميمه ..

* الداهية الأعظم .. برنامج يقدمه ممثل مصري سابق .. والحلقة اللي شفتها كانت مع شعبان عبدالرحيم الاركوز المصري مع محمد اللنجاوي .. كانت حلقة في منتهى السخرية .. واللي يشوف الحلقة يقول ان المقدم متهاوش مع مرته وجاي يضحك في البرنامج .. يسولف ويضحك بروحه يا شباب .. وطبعا الاركوز المصري يضحك معاه وهو مايدري شسالفه .. الصراحة كسر خاطري بولنجا .. احس انه توهق معاهم ..

* برنامج أنغام عربية .. الصراحة برنامج جيد لكن ينقصه دقة العمل .. فهو برنامج يطلعك على مقامات الطرب العربي .. كانت الحلقة اللي شفتها عن مقام البياتي .. وحطوا اغنيه لعبدالحليم من مقام الحجاز .. ويقولون انها من مقام البياتي .. ومع معرفتي البسيطة في هذي السوالف اني متأكد انها من مقام الحجاز ..

* جلسات شعبية .. أوقات عرض 100% خطأ .. ياناس جلسة شعبية وايد شباب يحبون يشوفونها وانا منهم .. ولا تنسون ان هالجلسات استضافت فنانيين كثار منهم عبادي الجوهر وعلي عبدالستار وكرمال .. يعرضونه يوم الأحد الساعه 10 ؟؟ ويعيدونه الثلاثاء الساعه 2 ونص الفجر .. من فاضيلكم هالوقت يعني ؟؟ المفروض مثل هالبرامج تعرض الخميس او الجمعه ..

الصراحة وايد اشياء في قلبي ودي اقولها .. بس اخلي الباقي عليكم .. وانا ما تكلمت عن الموضوع الا يوم تكلموا علينا .. اللي يسوى منهم واللي ما يسوى تكلم عن تلفزيون قطر !!

ننتظر الفرج

فراولة الكتكوتة
10-06-2004, 12:55 PM
اقدر اضم صوتي لصوتك

واقول لتلفزيون قطر

الله يرحم ايام زمان:18:

حتى قناة LBC احسن من قناتنا :13:

اللي تحب تقلد :26:

على الأقل LBC عندها برامج وايد :13:

اجتماعية :ah:

وقضايا مهمة :13:

مب كله اغاني ورقص :133:

مثل تلفزيون قطر:22:

اللي صار

؟؟؟؟؟؟:16:

مشكور Q-EYES

على موضوعك المهم واعتقد التلفزيون

لازم يشوفون لهم حل

في اللي يتمرنون :18:

واللي يهزون:21:

واللي يتمايلون:26:

رهــ(R.A.R)ــيب
10-06-2004, 03:56 PM
شوفوا دبي شلون طوروها وشوفوا تلفزيونا

كل دوره برامجيه نفس الببرامج بس اللهم يغيرون الاسامي((بالفيت طوروا))

هع

شبيه M الريح
10-06-2004, 03:59 PM
الكل يسير للأمام ونحن نسير للخلف

سدا(قطري)وي
10-06-2004, 09:51 PM
الرسالة الأصلية كتبت بواسطة رهــ(R.A.R)ــيب
شوفوا دبي شلون طوروها وشوفوا تلفزيونا

كل دوره برامجيه نفس الببرامج بس اللهم يغيرون الاسامي((بالفيت طوروا))

هع

الحين برامج دبي متطووورة..:14:

والله كانت برامجهم احلى بواايد.. اما الحين كل البرنامج تعتمد على البنات في تقديمها.. ومالها اي هدف..

الكاسر99
10-06-2004, 11:09 PM
مالت على برامجهم كلها أغاني ورقص ومسخرة والله كل اللي أفكر فيه من هو اللي


يختار هاالبرامج وشئ بيكون موقفة أمام رب العالمين لأن كل اللي يشوفون الأغاني


والرقص والبنات المفاصيخ كل سيئاتهم في أرقبته


اللهم لا تؤاخذنا بما فعله السفهاء منا

- النـــــوار -
10-06-2004, 11:43 PM
السلام عليكم ورحمة الله وبركاته

بصراحة موضوع ممتاز .. جزاك الله خير اخوي ..



انا معاكم ان في بعض البرامج في التلفزيون مش ولابد ولكن في مجموعة جيدة ..


واذكر برنامج بصراحة ماعرف اسمه ولكن هو يتكلم عن السياحة في قطر اعتقد وايد عجبتني التنقية اللي مستخدمينها في هذا البرنامج ..

عجبتني البرامج الدينية المختارة و خزز بس لانهم حطوا كونان الجزء الثالث .. :25:

وبرنامج بحار ممتع بعد .. واكيد البرامج اللي تتكلم عن الاخبار المحلية مثل الدار ..
وبرنامج سبورت ارت ..



هذي الايجابيات .. نجي حق السلبيات ..



بالرغم من الانتقادات اللي وجهت للتلفزيون الا انهم معطينا بو لابس ..
متى بنفتك من " التمارين الرياضية " .. والتمارين ماتصير الا بحريم لابسين سترجات ؟!

اوقات المسلسلات الخليجية .. الصبح من بيتابعها :17: ..
والساعة 7 ونص مسلسل مصري من بيتابعــــه ؟!

يوم الخميس سهرة مع مهرجان الأغنية " حفظناه ترى " وسهرة غريبة عجيبة ماعرف وين مصورة بس انصدمت مرة من وجود اللنجاوي ..

سبورت ارت .. ياليت نراعي الاسماء العربية " صج هويتنا فالمشمش " ..:15:



اقتراحاتي المتواضعة ..



يوم الخميس ترفع فيه الاعمال ياليت تخلون سهرتنا مع محاضرة حلوة مثل محاضرات صناع الحياة يعني بدل الفلوس اللي رايحة على برامج غير مفيدة .. اوعرض محاضرات اقيمت في قطر ..

او عمل برنامج شبابي " يعني بس مهتمين بالاطفال وخزز " واحنا محد معطينا اهتمام ..:29:
يحتوي البرنامج على فقرات مرحة ومفيدة مثل فكرة يللا شباب ..
بشرط ان يقدم هذا البرنامج شباب قطر وشرط هذا البرنامج ان يكون له هدف ..
يعني مثلا تكون فيه فقرة لعمل لقاء مع مواهب او دعاة من الشباب او متطوعين لاعمال الخير او متطوعين للاسياد او يعرض مشاكل طلاب الثانوية والجامعة وطالبات الجامعة " الجامعات بشكل عام " ..


اواحب اذكر برنامج يعرض في التلفزيون اسمه ابداع بصراحة شي جميل ان نشوف مبدعين قطر ولكن مالفائدة نشاهد ولانستفيد احنا نبي برامج مفيدة نبي برامج تشغلنا .. برنامج مثل ابداع لازم نتعلم منه كيف نبدع ولانكتفي فقط بمشاهدة المبدعين ..
نبي نوصل لدرجة الابداع نبي نكون اكثر ايجابية في حياتنا ..



مب عيب لو التلفزيون قدم اشياء مفيدة ..
ولكن العيب انك يوم تفر هالقنوات ماتلقى شي مفيد ..

وانا عن نفسي ما القى الفائدة الا في بعض البرامج الدينية في بعض القنوات ..
و للترفيه اشاهد :
" كونان - توم اند جيري - مسلسلات خليجية ان وجد - مباراة مهمة ان وجد - مسرحية "



الحين برامج دبي متطووورة ..

والله كانت برامجهم احلى بواايد.. اما الحين كل البرنامج تعتمد على البنات في تقديمها.. ومالها اي هدف..



صدقت والله ياشيخنا ..

احلى مافي دبي تصاميمهم فقط :15: ..
ولا برامجهم ماعادت مثل قبل لدرجة اني ماعرفت القناة وفكرتها من طخة " البس واخلع سوري LBC وهالشلة " ..
واول ماشفتها قلت حق الاهل منو مطلع هالقناة في بيتنا << ماسحين نص قنوات الدش شنسوي كلها دمار .. :25: ..

ولكن عقب عرفت انها دبي :12: ..

والسلام عليكم ورحمة الله وبركاته

الملك
10-06-2004, 11:54 PM
انا معاك

طريقه الاخبار كلش

وخصوصا الديكور

كنه تلفزيون ارتيريا

اتمكنى التطوير

محمداوي
11-06-2004, 12:00 AM
ياأخي خللك(شاهد ماشافش حاجة)

قطــ المشتاق ـر
11-06-2004, 12:40 AM
مساكم الله بالخير ..




بالفعل .. حاله من التخبط الغير طبيعيه يمر بها تلفزيون قطر هذه الأيام .. ابتداءً من البرنامج الرياضي وتوقيته الخاطئ .. من له نفس يسوي تمرينات بعد الغدا ؟؟ هالنوعيه من البرنامج تنعرض على الفضائيات في التوقيت الصباحي بس الاخوان في التلفزيون يبون يتفلسفون ( امحق فلسفه :29: ) !!


برنامج ( كاريزما ) ماهو الا تقليد أعمى لباقي البرامج الحواريه .. فقد افقتد هذا البرنامج للهويه القطريه التي من المفترض أن تكون في جميع البرامج التي ينتجها التلفزيون .. فالبرنامج وبالرغم من المبالغ الطائله التي صرفت عليه من قبل التلفزيون الا انه اصطبغ بالصبغه ( المصريه ) وتم تهميش الفنانين القطريين فيه !! :16:


وباقي البرامج لا تقل ( سوءً ) عن ماذكر أعلاه !! الله يعينا على التلفزيون اللي ماينشط الا في شهر رمضان وباقي الأشهر فهو في سبات عميق !!




http://www.shathaaya.com/vb/images/smilies/i.gif





يعطيكم العافية:24:

علياء قطر
11-06-2004, 01:04 AM
السلام عليكم ورحمة الله وبركاته


بالعكس انا أشوف ان تلفزيون قطر تطور عما كان عليه...
ولا قبل ماكنا نشوف شئ عدل...كله برامج معاده وقديمه وتلوع الجبد
اما الحين نلاحظ تطور بسيط...

انا مش من متابعين تلفزيون قطر لكني امر عليه بين فتره وفتره وأحلى برنامج فيه واللي احس ان فيه منه فايده هو " ضحى الدوحه" على مااعتقد... و البرنامج اللي قبله بعد اللي يتكلم عن قطر ويناقش مايحدث فيها...مادري شسمه...

بس مثل ماقلتوا في أشياء غلط ويبي لها تعديل...
والمفروض انتقادنا يكون ايجابي وفي صالح تلفزيون قطر...وياريت هالتلفزيون يسمع انتقاداتنا ويطبقها ومايعيطنا " السين مثل كل مره " ...

عندكم مثلا قناة " الامارات مادري ابوظبي " وحده منهم ... المهم
والله يعرضون برامج خشنه ومتعوب عليها ومنها فايده يعني مب خرابيط وضحك ع الفاضي...
ياريت الأخوان يتعلمون منهم... وياخذون المفيد ويتركون التقلييد السلبي


تحياتي
وشاكريين لك غيرتك ع تلفزيونا الموقر

كحيلان
11-06-2004, 01:47 AM
السلام عليكم ورحمة الله وبركاته

الصراحة موضوع قوي وحساس، لأنه يمس جميع طبقات المجتمع، ما فيه واحد ما يطالع التيلفزيون إلا ما ندر، لكن يا ريت لو أن التيلفزيون يطلع على هالملاحظات أو يأخذها بعين الاعتبار، لأن أولاً وأخيراً التيلفزيون لنا وحق أهلنا، يعني من حقنا أن يكون لنا رأي في اللي نشوفه، لكن مع الأسف الديمقراطية كلمة تقال وتردد ولكن دون تطبيق.

ولد قطـــر
11-06-2004, 02:30 AM
السلام عليكم

انا بصراحه ما اشوف قناة قطر الا نادرا ...

لكن اعتقد ان القناه القطريه و دبي هم افضل قناتين خليجيتين حاليا

...

بصراحه ما خليتوا لي شي اقوله ... ماعدا نقطه وحده ... وبصراحه هو شي مضحك
مبكي في تلفزيون قطر :17:

يا جماعه عمركم شفتوا تلفزيون ما يفتح الا عقب الساعه 9:30 ؟؟؟ ههههههه

معقوله تلفزيون يتم نايم لين 9 ونص :29: ... باقي المحطات الخليجيه تفتح من صباح
الله خير .. من 7 او 7 ونص ... ويحطون البرامج الصباحيه وفقرات روعه ويستعرضون
الجرايد بجميع ملحقاتها ... وربعنا نايمين :29:

لا والمصيبه لين فتحوا القناه اول شي يحطونه كارتون من سنة الف وتسعميه وحطبه
وبعده مسلسل بعد من سنة جدي مادري شسمه ... وبعده برنامج ضحى الدوحه " ما ادري
اذا الاسم صح ولا لا " وفي هالبرنامج يحطون اخبار الدوحه والاحداث المحليه وغيرها
من الفقرات ... يعني البرامج اللي لازم تنعرض الصبح يعرضونها الظهر ... والبرامج اللي
لازم تنعرض الظهر يحطونها الصبح

هاذي السالفة توني مكتشفها يوم الثلاثاء بس :29:

بصراحه اللي قاعد ينعرض في تلفزيونا اسمه مهزله وتفاهه ... واتمنى رسالتنا هاذي توصل لادارة التلفزيون ويهتمون فيها ويحاولون يطورون من قناتهم

الاستعـ180ـلامات
11-06-2004, 10:41 AM
يعطيكم العافيه على التفاعل الرائع .. كلكم ماقصرتوا

بالنسبة حق الايجابيات في تلفزيونا .. صحيح ان فيه ايجابيات عديدة ..

اولها برنامج ضحى الدوحة .. والدار .. وجنة الحياة للاخ عقيل الجناحي .. وبرنامج ديني يعرض الساعه 1 ونص ما اذكر اسمه .. خزز كان رائع للاطفال والدليل المتابعه الغير عادية من الاطفال (( والله اذكر ولد خالي الصغير ضربني عشانه:12: واستسلمت عقبها وحطيته له ))

لكن الاوقات تعبانه يا شباب .. مثل ما ذكر اخوي ولد قطر .. تلفزيون يفتح 9 ونص ؟؟ المفروض التلفزيون يفتح الساعه 6 ونص .. ويبدا بالقران الكريم بقراءة جيدة مثلا القارئ الشيخ احمد بن علي العجمي .. بعدها يحطون برنامج صباحي ولامانع من وجود برنامج لتدريب الرياضة لكن بحدود .. قراءة بعض الصحف المحلية .. لقاءات مع شخصيات هامة والمناقشة ..
ولاتنسون ان الحين اجازة يعني محد بيطلع حق المدارس .. كلهم في بيوتهم ..

بس فيه نقطة ضد الاخ ولد قطر .. قال فيها ان تلفزيون قطر ودبي افضل تلفزينين حاليا .. اقوله يا خوي شوف تلفزيون الكويت والبحرين .. شوف البرامج الغير طبيعيه في تلفزيون الكويت والبحرين أيضا .. والله انا في وجهة نظري تلفزيون الكويت من أفضل المحطات حاليا ..

واشكر الاخت النوار على المشاركة الرائعة وكذلك ولد قطر ووردة الماجد وطبعا مشرفنا قطر المشتاق

قطــ المشتاق ـر
14-06-2004, 10:02 AM
صبحكم الله بالخير ..




عودة مع برامج تلفزيون قطر .. بصراحه لفت انتباهي برنامج مسابقات يقدمه المذيع ( محمد اللنجاوي ) اللي عودنا بتقديم برامج الأطفال ولكنه هالمره تطوّر وأصبح يقدم برنامج مسابقات للكبار .. بصراحة البرنامج كئيب جداً وحتى الاسئله ركيكه جداً جداً جداً .. وبالرغم من تفاهتها الا اني شفت بعض الأخوات يترجون المذيع لاعطاءهم الاجابه الصحيحه ومنحهن فرصاً أخرى .. هالمشهد ذكرني بتوسلات الحريم في البرنامج الرمضاني ( الليوان ) وكأن احنا قاعدين في مؤسسة خيرية .. والله عيب !!





http://www.shathaaya.com/vb/images/smilies/i.gif






يعطيكم العافية:24:

ولد قطـــر
14-06-2004, 11:25 AM
الرسالة الأصلية كتبت بواسطة قطــ المشتاق ـر

عودة مع برامج تلفزيون قطر .. بصراحه لفت انتباهي برنامج مسابقات يقدمه المذيع ( محمد اللنجاوي ) اللي عودنا بتقديم برامج الأطفال ولكنه هالمره تطوّر وأصبح يقدم برنامج مسابقات للكبار .. بصراحة البرنامج كئيب جداً وحتى الاسئله ركيكه جداً جداً جداً .. وبالرغم من تفاهتها الا اني شفت بعض الأخوات يترجون المذيع لاعطاءهم الاجابه الصحيحه ومنحهن فرصاً أخرى .. هالمشهد ذكرني بتوسلات الحريم في البرنامج الرمضاني ( الليوان ) وكأن احنا قاعدين في مؤسسة خيرية .. والله عيب !!



بغض النظر عن البرنامج ... محمد اللنجاوي صار ( بتاع كلوه http://www.marsauae.com/vb/images/smilies/marsa3.gif ) مره تلاقيه يعلق على مباراه و مره تلاقيه مع اليهال والحين مع برنامج حق الكبار ... هل سيأتي اليوم اللي نشوف فيه محمد اللنجاوي في مكان اخر ؟ :29:

ما اعتقد ... لان مافي شي ما سواه :17:

الاستعـ180ـلامات
15-06-2004, 01:22 AM
لا وازيدكم من الشعر بيت ..

مسلسل " قطري " .. لكن مايعرض على تلفزيون قطر كالعادة .. هالمرة يعرضونه تلفزيون الكويت وخصوصا القناة الرابعة .. في حدود الساعه 1 ونص ..
استغربت ليش عارضينه التلفزيون الكويتي .. هل يبون يتمصخرون علينا والا وشو ؟

مادري ايش اسم المسلسل .. لكن الصراحة الصراحة .. قمة في السخافة والاحراج .. المسلسل فاشل في كل النواحي ..
ـ اولاً ـ الممثلين .. وياسلام على الممثلين .. خاطري اشوف ممثل منهم يرفع الراس " مع الاحترام " ولكن للأسف ما لقيت .. الرجال غترهم من سوق الخميس والجمعة .. والثياب من خياط " خيط ثوب و5 مجاناً " .. البنات .. الصراحة ماشفت الا ممثله وحده والمعروفة " ___ " واللي كانت تقدم لأحد برامج الاطفال وهي حاطه مكياج خيرية الطقاقة .. والجنسين الرجال والاناث الحرقات (( تؤكد )) انهم من قطر .. حرقات غريبة عجيبة وكأن المسلسل من انتاج شيرازي ..

_ثانياً_ الديكور .. نعرف ان الكويت وقطر أفضل دول الخليج العربي في تصميم البيوت واثاثها .. لكن هذا المسلسل اهبط قطر الى القاع في الديكور .. سرير الظاهر مأجرينه من ناطور عزبة .. والباب اعتقد انه كان باب لأحد بيوت العمال في الصناعية .. البيت من برا روعة .. من داخل قمة في البلادة ..

_ ثالثاً _ الانتاج .. اعتقد انه محلي لاني مالحقت على المسلسل من بدايته .. لكن في النهاية شفت ان المخرج اسمه " سالم الكردي " والصراحة مامر علي هذا الاسم من قبل .. ولكن مكتوب انتاج الدوحة قطر .. وياسلام على الدوحة قطر اذا كان النص والمسلسل بهذا الشكل المخزي .. فعلا فعلا فعلا فعلا تأكدت ان مسلسل بدون المبدع عبدالعزيز جاسم وجهوده بيكون مسلسل قمة في التخبط الفكري والفني ..

نقطة اخيرة .. استغرابي من عدم عرض هذا البرنامج في قطر .. والا يمكن تلفزيون قطر ماعنده وقت حق الاعمال المحلية لانشغاله بـ"تدريبات الاخ الرياضية مع البنات " .. وربما يكون التلفزيون قطري رفضه لكي لا تتشوه سمعته وخصوصا ان المبدع عبدالعزيز جاسم يعد العدة لمسلسل تكلموا عنه حتى الصحف والمجلات الكويتيه واصفينه انه اكبر عمل تلفزيوني في رمضان ..

مع الاحترام لكل الممثلين .. ولكن الرجاء عدم تشويه صورة قطر والتكلم باللغة العامية العدلة والا اذا ماتعرفون تكلموا باللغة العربية الفصحى أهون بكثير .

تحياتي

ولد الدفنه
15-06-2004, 03:25 AM
مشكور اخوي q - E y e s على الموضوع الجميل...

موضوع تشكر عليه..

والنقاط الي في الموضوع احلى واحلى..

اولا:

بخصوص برنامج التمارين الرياضيه: فهو برنامج "مصخره".. يقعد المدرب يسوي حركات :14: .. استغفر الله.. والبنات الي معاه يبون يسون هالحركات.. وهو عاد انه يساعدهم.. بس اعلم شيسوي هاللبناني الوصخ:11:

ثانيا:

بخصوص اعادة الجلسات الشعبيه.. فأنا اضم صوتي لصوتك..

احنا نحب نسمع هالجلسات .. بس مانسمعها كلش.. لان الي ماعنده دوام بتكون عنده مدرسه... واذا مب مدرسه جامعه.. يعني لازم ترقد من وهل..

واخيرا:

قمنا مانشوف مسلسلات كلللش..

يوم يحطون مسلسل لبناني.. من زينه!!..

ويوم مسلسل سوري..

ومحد يفهم شي..

نبي نشوف مسلسلاااات خليجيه.. وليش خليجيه نبي مسلساتنا القطريه.. كل واحد احسن من الثاني..

وهالايام يحطون حتى اشعار اخر..

ويحطونه الفجر.. في ذمتكم.. حد بيتم يشوف المسلسل الفجر.. ولا.. عاد انهم مسوين شي زين.. يوم الجمعه يحطونه العصر على ماأعتقد... اصلا يوم الجمعه محد يقر في البيت

والله التخلف زاد بدال لا يختفي..

ان شاء الله يتعلمون من قناة الجزيره او دبي او اي قناة من القنوات العجيبه

الاستعـ180ـلامات
15-06-2004, 03:35 AM
وازيدك من الشعر بيت ..

مسلسل حتى اشعار اخر يحطونه مرة في الاسبوع .. شدعوه مرة في الاسبوع .. اسمه مسلسل يومي .. شهالزهق

ولد الدفنه
15-06-2004, 03:39 AM
مع ان المسلسلات القطريه في الاونه الاخيره تفوقت على غيرها من المسلسلات الخليجيه..


بس شتقول.. خلها على الله

الاستعـ180ـلامات
15-06-2004, 03:43 AM
لا ونسيت اذكر برنامج باس ستوب .. برنامج ترفيهي اعتقد يقام في قطر .. ومن انتاج التلفزيون ..

المذيعين من برع .. اللاعبين من برا .. اللهم كم واحد من الجماهير القطريين موجودين .. شالفايدة انه من انتاج قطر ؟؟ دام ان احنا ماندري عنه .. وين الاعلانات اللي لازم يسووونها عشان يستقبطون انتباهنا ..

وانا انسان رياضي احب هالسوالف :26:

ولد قطـــر
15-06-2004, 03:44 AM
شخبار ذهبيه جابي :23:

لا تقولون لي ليلحين قاعده " تطقطق " في القناه :ac:

الاستعـ180ـلامات
15-06-2004, 03:45 AM
والله مادري عنها .. خلاص البنيه كبرت .. اتوقع عمرها وصل الألف

انا ذبحني التلفزيون يوم جابوا مذيعة عراقية حق برنامج مايطلبه المشاهدون قبل شهرين .. كلامهم يضحك وهي شكلها من حزب المقاومة هناك ..

ولد قطـــر
15-06-2004, 03:53 AM
لووووووووول

عيل ما شفت هاذيج اليمنيه اللي طلعت من التلفزيون ... اسمها داليا يمكن

لو تشوف وجها تقول ما تمت خبيرة تجميل ما لعبت في وجها
بصراحه هاذيج خطيره ... كل الالوان تلاقيها في وجهها http://www.marsauae.com/vb/images/smilies/marsa3.gif

وانا متأكد انها اذا شالت المكياج وجها ما " ينتشاهد " :26:

الاستعـ180ـلامات
15-06-2004, 03:55 AM
وانا اقول جدتي الله يطول عمرها صارلها مدة وهي تلبس نظارة شمسية جدام التلفزيون.


اليوم المذيعة من برنامج الدار .. قالت ان بعض الأطباء (( عيارة وجمبزة ))

ولد قطـــر
15-06-2004, 04:07 AM
ههههههههه

يا خي خلها على الله

بصراحه تلفزيونا كل مذيع فيه ابيخ و اجهل من الثاني

بس متى يفهمون ان التقدم ليس بشكل التلفزيون بل بمحتواه وما يعرضه من برامج :12:

الله يخليك روح بس شوفهم وش حاطين الحين :29:

الاستعـ180ـلامات
15-06-2004, 04:09 AM
المشكلة ان التلفزيون يعرض برامج رائعة .. واحيانا يطرحون مواضيع أروع .. مثل حلقة اليوم من برنامج الدار .. كان الموضوع يتحدث عن الطب الشعبي وكان أحد الاطباء الشعبيين موجود .. موضوع رائع وطرح رائع ..
بس الله يهديهم فيه برامج غلط انها تنعرض

ســـ قطر ـــد
15-06-2004, 06:11 AM
باااااااااااااااال

تحس انكم ( شرشحتوا القطرية ) !!
بذمتكم في قناة اسمها ( القطرية ) اشدعوه طيران :23:

لا تبون الحق رغم السلبيات الكثيرة في برامج وايجابيات حلوه مثل :

- برنامج جنه الدنيا لعقيل الجناحي وووايد حلو ومفيد .. واسلوبه شبابي بحت ..

- برنامج خزز وفرور مافي ياهل في الدوحه ما يشووووفه ..

- برنامج المسابقات مثل تيلي ماش وووايد حلو .. واسلوبه جديد ..


السلبيات :


- برنامج ( جيرار ) قمة في الانحطاط .. يركز على اماكن ( غريبه ) من جسم الصبايا ويبون الشباب يسون رياضه !!

- الجلسات .. والمهرجانات مادري متى يحطونها !!
شكلهم يحطونها بالخش !!

- ضحى الدوحه .. وبرنامج على وين ..
برامج مفروض انها محلية يقدومنها وحده بحرينيه ووحده تقول ( سي لاين ) مو سيلين بلفيت بالانجليزي .. !! ايييييييييييي ده !!
المفروض قطريين او قطريات يفدمون مثل هالبرامج او على الاقل مقيمين !!

بس الظاهر التطور اللي ينشدون له ..
عرفوه متاخرين فقاموا يخبطون !!
اي شي في اي شي

شعار القطرية !

قطــ المشتاق ـر
15-06-2004, 09:02 AM
صبحكم الله بالخير ..




بخصوص المسلسل اللي ينعرض على قناة الكويت .. اسمه ( درب المطايا ) عفواً ( درب الخطايا ) .. وهالمسلسل للأسف انه عرض على تلفزيون قطر على انه المسلسل الرئيسي في رمضان من كم سنه ولاقى هجوم غير طبيعي لأنه لا يرتقي لمستوى المشاهدة !! وعلى فكرة ترى هالمسلسل يعرض على قناة دبي الفضائية بعد !!



والله ان عندنا مسلسلات قطرية قديمة تقدر تنافس جميع السلسلات الحديثة اللي تنتجها تلفزيونات الخليج مثل ( عفواً سيدي الوالد .. فايز التوش بجميع أجزاءه .. التائهه .. تناتيف ) وغيرها بس مادري الأخوان في التلفزيون ليش مايعرضونها لنا ومتعلقين بالمسلسلات المصرية اللي تلوع الجبد .. واذا عرضوا مسلسلات قطرية يعرضونها الفجر .. علشان ديك بيت الجيران يشوفها :16:



والله اني ماتابع ولا برنامج على القطرية لأنها قناة لا تستحق المتابعة أصلاً .. كئيبه وممله وترفع الضغط .. الناس يتطورون واحنا للحين التطور عندنا ( حبر على ورق ) !! ونجي للمذيعات اللي بصراحة مافيهم غير المذيعة البحرينية ( معصومة عبدالكريم ) اللي تقدم برنامج ( ضحى الدوحه ) أشوف انها مثقفه وواعيه أما الباقيات ( حدث ولا حرج ) محد مخلص المكياج والعدسات من أسواق الدوحة غيرهم :26:





http://www.shathaaya.com/vb/images/smilies/i.gif






يعطيكم العافية:24:

زعيم قطر
15-06-2004, 09:30 AM
اخوي كلامك صحيح
برامج قطر بايخة لكن لاتنسى في برامج 10 على 10 تاخذ
مثل ضحى الدوحة الي يتكلم عن الدوحة والمؤتمرات او قرارات
كل شيء تحصلة بهالبرناج ووقته 11 ظهرا
والساعه 2 اعتقد يحطون برنامج من تقديم مذيعه بحرينية
وتستضيف ناس ويتكلمون بمواضيع مهمه
امس تكلمو عن مصنع قطري 100 بالـ 100
وتكلمو مع باحث شعبي
اول امس استضافو مخرج سينمائي قطري
وتكلمو عن السينما وهل قطر قادرة وجذي
مواضيع جميلة
لكن بعد هالتمارين الله يستر شيسوون ويجيب عوار الراس
وسبورت آرت الي يقدمة حمد العنزي برنامج حلو
اتمنى انه يتطور والقهر ان البرنامج ساعه مادري ساعه ونص :19:
على الاقل ساعتين وبرنامج سريع وشصار بالدوحة وجذي
ابرك من تمارين وطبخ وبرامج مالها معنى

ومشكور

AL3GRAB
15-06-2004, 12:24 PM
ممكن المايك

احم احم

123

صوتي ok

طيب

------------------------

والله محد رافع روسنا غير صوت الخليج :ac:
المهم ما علينا
بالنسبه للقطريه فهي شغله عويصه ..
سلبياتها اكثر من إيجابياتها
ببدأ بالسلبيات + الإجابيات + الإقتراحات

السلبيات

- قناة تفتح الساعه 9,30 ..! معصره ذي مب قناه؟
- النشره الجويه غبار .. حطوا درجات الحراره وخلاص .. لازم تقولون قصة حياتكم ؟
- مسلسلات قديمه وتوقيت ماميش على قولة الدرويش .. لا والحين عايدين الحجاج بس مترجمينه للإنجلش .. لوووووول
- برامج مصخره ( جرار العله و دي جي و ما شابه )
- مافي إهتمام بالمشاهد .. الحين انت متابع مسلسل يجون يقطعون عشان يحطون شي ثاني؟
- اللنجاوي مادري شيبي .. !! خله يفتح له مطعم جباتي احسن ..
والكثير صراااااااااااحه

الإيجابيات

- البرامج الدينيه وخاصه مفاتيح القلوب ..
- خزز وفرفور .. بالرغم من ان الوقت طويل لكنه زوين للأطفال ..
- البحار الدار ضحى الدوحه ... في برامج ملموسه حلوه ..
- بس .. هاي اللي اذكره

الإقتراحات

- القناة مفتوحه 24 ساعه ..
- خل يحطون برامج شبابيه .. مسابقات عدله غير برنامج لنجا شو << امحق اسم بس !
- إلغاء برنامج ديجي .. اللي كل الإتصالات من السعوديه ..
- حطووو مسلسلات عدله .. حطو خليجيه .. مب كله مصري ..
- المسلسلات اللي تنحط الساعه 10 الصباح .! حق منو تحطونهم !!
- وضع كوادر جديده ..
ووايد بعد

(( في النهايه اقول ))

القطريه عمرها ما راح تتطور ..
دام هالإهمال موجود

المشاهدين صاروا ديكور للتلفزيون ..

:ad:

الاستعـ180ـلامات
15-06-2004, 12:43 PM
والله كلامكم عدل يا شباب .. تلفزيون قطر مأساة ما نقدر نستحملها وايد ..

فيه سالفه صارتلي من اسبوعين تقريبا ..

الساعه 2 ونص اتصلت في تلفزيون قطر ابي اسأل عن الجلسات الشعبية والمطرب اللي بيقدمها هالاسبوع .. اتصلت يا شباب ردت علي وحده والعياذ بالله .. لسانها متبري منها ..
قالتلي : هااااا شتبي .
انا : الشيخه بغيت اسأل عن برنامج
هي : أي برنامج الحين وييييييييه الناس رقووود
انا : بل راقده انتي .
هي : ضحكة سخيفة فيها الكثير من المعاني الغريبة
انا : اوكي ما تقدرين تحوليني على واحد يعرف شسالفه
هي : اقولك ماميش حد في التلفزيون شبلاك انت
انا : اوكي باي (( وبكل براءة ))

الرهيب
15-06-2004, 12:51 PM
اضم صوتي لصوت جميع الاعضاء ..

تلفزيون قطر زفت زفت زفت زفت ما يواكب التطورات اللي تشهدها البلد في كل المجالات ..

النقاط الوحيده اللي تحسب له:

مسلسلات رمضان العام
برنامج السياحة في قطر
برنامج عقيل

اما الباقيييييييي زففففففففففت

و اكثر شي يقهرني القسم الرياضي!!!!! دورينا اللي مفروض يكون عالمي و مصروف عليه كل هالفلوس مكانك سر!!

تغطيتهم للبطولات الرياضية تعبانههههه